Autori:

Mirëdita redaksia e Albanian Mail.
Gjatë shumë kohëve këtu në Mbretërinë e Bashkuar më ka qëlluar të takoj me dhjetëra djem e vajza të moshave dhe niveleve arsimore të ndryshëm. Po shkruaj për të treguar një fenomen i cili takohet shpesh në komunitetin tonë.
Siç mund ta keni konstatuar edhe ju gjatë punës tuaj, vajzat shqiptare kanë ecur më shumë se meshkujt si në arsim ashtu edhe në postet apo profesionet që ato kanë. E çuditshmja është se meshkujt shqiptarë shumë shpesh nuk jane rehat në shoqërinë e këtyre vajzave dhe i akuzojnë ato për vajza “që shitkan mend dhe mbahen me të madhe”, apo vajza “që nuk mund të merren në konsideratë për të nderuar familje”. Këto shprehje i kam dëgjuar nga mikeshat e mia të cilat kanë pasur momente të vështira me partnerët e tyre mbasi kanë kaluar ndonjë mbrëmje me shoqërinë e vajzës. Me sa kam kuptuar gjatë këtyre mbrëmjeve ku shoqja ime ka qenë me partnerin ne fjalë janë bërë biseda apo janë hapur tema të cilat kërkojnë një farë kulture dhe ajo është ndjerë shumë keq kur partneri i saj ka thënë opinione të cilat ishin të pavenda. Kuptohet që mbas mbrëmjes ajo është munduar më shumë durim t’ia bëjë të qartë që ai nuk duhej të shprehej në atë mënyrë dhe kjo e ka bërë partnerin e saj të shpërthejë duke e akuzuar për femër e cila do t’i kontrollojë opinionet që shpreh. Këto momente kanë qenë të shpeshta mes çiftit dhe ajo ka arritur deri atje sa të mos i kërkojë më partnerit të saj që ta shoqërojë nëpër festa apo evenimente të ndryshme dhe kjo lloj sjellje ka bërë ftohjen e tyre.
Një rast tjetër që më duket e rëndësishme për ta treguar është edhe rasti kur meshkujt ndihen mirë afër një vajze e cila është profesioniste dhe që i bëhet krah atij gjatë ditëve, javëve apo viteve. Në momentet kur midis çiftit vendoset që të finalizohet lidhja djali tërhiqet, pasi familja e tij në Shqipëri nuk e pëlqen një vajzë e cila ka jetuar me vite larg prindërve të saj, pas nuk përputhet me kriteret e “vajzës për shtëpi” dhe reagimi i prindërve të djalit është i tipit “çfarë familje paska ajo që e ka lënë vetëm në Angli?” apo “ku e di ti se çfarë ka bërë ajo në Angli gjatë viteve që nuk ka qënë me ty?”. Mjafton kaq dhe djali fillon e spërdridhet me justifikimin që nuk mund t’ua thyej zemrën atyre të shtëpisë, pas prindërit i ka në moshë të thyer dhe nuk mund t’ua shpjegojë situatën. Sa fëmijë duhet të jetë një mashkull që të mos arrij t’i bëjë ballë një situate të tillë dhe të jetë i paaftë për të marrë vendime për veten?

Nga rastet më lart (ka edhe shumë të tjera) nuk është e vështirë të arrihet në konkluzionin që meshkujt (në këtë rast flas për meshkujt e komunitetit tonë) gjenden në një pozicion të vështirë përballë femrave të tilla. Arsyeja? Mendoj që ata ndihen inferiorë dhe nuk arrijnë të ecin me të njëjtin hap me partneret e tyre dhe preferojnë më mirë të reagojnë duke shpërthyer apo duke ndërprerë një relacion i cili u ka marrë vite dhe mund për t’u krijuar. A e shikoni të mundur që t’i shkundni këta meshkuj dhe t’u shpjegoni që kohët kanë ndryshuar dhe që ato vajza kanë derdhur djersë e mund për t’u bërë të zonjat në punët dhe profesionet e tyre?

Blerina
h.blerina@yahoo.com


PERGJIGJE NGA REDAKSIA

E dashur
Blerina,
Të falënderojmë për faktin që ke shkruar në redaksinë tonë për një problem i tillë i cili nuk është trajtuar më parë nga lexuesit. Me sa kuptoj këto lloj situatash i kanë vënë mikeshat e tua në prova shumë të rënda.
Në lidhje me faktin që meshkujt nuk janë të qetë përpara femrave me arsim dhe kulturë më të lartë se ata, mendoj që ky rast është shumë i zakonshëm jo vetëm më meshkujt e komunitetit tonë, por në të gjithë botën. Nuk mund ta themi me siguri nëse femrat shqiptare kanë ecur apo jo më shumë se meshkujt shqiptarë, pasi për këtë konkluzion duhet të bëhen studime dhe konkluzioni duhet të jetë i bazuar në fakte. Sikurse edhe ju, mendoj që ka çifte të cilat kanë një disnivel kulturor dhe herët apo vonë kjo gjë do të reflektohet, por këta njerëz duhet ta dinë një gjë të tillë që në momentin që krijojnë lidhje dhe në rast se nuk e pranojnë njëri tjetrin për atë që janë atëherë është më se e zakonshme që ata të gjenden në situata të tilla. Kij parasysh që këto situata nuk krijohen brenda natës, ato kanë ekzistuar gjithnjë midis këtij çifti, vetëm se mikesha jote i ka injoruar për një kohë të gjatë dhe tani është duke parë pasojat.
Në lidhje me rastin e dytë, është me të vërtetë për të ardhur keq, pasi mendohet që brezi i ri duhet të shikojë më larg se ç’mund të shohë prindi i cili është rritur në një vend që është më pak se gjysma e Londrës. Të jesh mashkull nuk do të thotë që automatikisht je edhe njeri që merr vendime, ka meshkuj që janë frikacakë dhe të paaftë për të vendosur se çfarë duan në jetën e tyre. Njerëzit e formojnë karakterin deri në moshën 18 vjeç dhe mbas kësaj moshe ata thjeshtë përforcojnë cilësitë dhe tiparet që kanë përfituar më parë. Me këtë dua të them që nuk mendoj se mund të ketë ndonjë mënyrë për t’i shkundur meshkujt që ju përmendni në letrën tuaj. Për një gjë jam e sigurt, që megjithëse këto vajza që ju i keni marrë si shembuj nuk vlerësohen si duhet nga partnerët e tyre, ato janë shumë të vlerësuara nga ambienti dhe shoqëria ku ato jetojnë dhe kjo gjë duhet t’i bëjë ato krenare për veten dhe të jenë të sigurta që mikeshat e tyre apo miqtë e tyre janë krenare për ‘to (ashtu siç je edhe ti).

Po ftoj lexuesit të shprehin opinionet e tyre.